Kryeministri Edi Rama dhe Ministrja e Shëndetësisë Ogerta Manastirliu kanë konfirmuar se nesër do të mblidhet Komiteti Teknik i Ekspertëve që do të vlerësojë masat anti-Covid në Shqipëri.

Teksa ka parë nga afër procesin e vaksinimit të punonjësve të transportit urban, Rama tha se jemi në një situatë optimale, por se ende nuk mund të parashikohet dalja nga tuneli.

“Ajo që unë mund të shtoj është se jemi në një situatë optimale në raport me strategjinë dhe planin e veprimit, por është shumë-shumë e rëndësishme që të mos harrojmë se sidoqoftë nuk kemi parashikueshmëri të plotë 100% lidhur me rrugën drejt daljes përfundimtare nga ky tunel dhe për këtë arsye duhet të vazhdojmë të jemi të kujdesshëm. Nesër komiteti do dalë me planin e ri, me lehtësim të mëtejshëm të masave dhe ambicia jonë për të pasur një sezon turistik shumë më të lehtësuar se sa ai i vitet të kaluar besoj se do të përmbushet, tha Rama.

Një deklaratë të ngjashme dha dje edhe ministrja Manastriliu, e cila teksa komunikoi mbylljen e pavioneve Covid në spitalet rajonale, u shpreh se këto dy ditë do rivlerësohen masat. Së shpejti Shqipëria pritet të çelë së shpejti sezonin turistik, ku do të synohet tejkalimi i situatës së vështirë të vitit të shkuar që u shkaktua nga Covid-19.