Gjykata e Lartë rrëzon pretendimet e Emiliano Shullazit dhe të bashkëpandehurve për t’u liruar nga qelitë e regjimit të egër “41bis”.

Kolegji tre anëtarësh i Gjykatës së Lartë nuk ka pranuar kundërshtimet e bëra nga të pandehurit ndaj vendimit të Apelit të Posaçëm për lënien e tyre në regjimin e sigurisë së rreptë.

Shullazi dhe grupi po vuajnë një dënim me 55 vite burg në total dhënë nga Gjykata për Krimet e Rënda për akuzat e “gjobëvënies” dhe “grupit të strukturuar kriminal”.

Ndërkohë çështja penale po shqyrtohet në Apel, por nuk ka ende një vendim

Afati që duhet të qëndrojë Shullazi në këtë regjim, përfundon në muajin gusht të vitit 2021.

Një vit më parë, izolimin si pasojë e regjimit “41-bis”, Emiljano Shullazi nuk e priti fare mirë, duke pretenduar se ndaj tij po bëhet padrejtësi.

Vladimir Meçi, avokati që mbron interesat e Shullazit, më gusht 2020 përveç kundërshtimit të këtij izolimi në Gjykatën e Posaçme të Apelit, iu drejtua me një letër edhe Kryeministrit Edi Rama, Presidentit Ilir Meta dhe kreut të Kuvendit, Gramoz Ruçi.

Nëpërmjet kësaj letre, avokati shprehej se vendimi për ta dërguar në burgun e sigurisë së lartë klientin e tij, është i padrejtë.

“Padrejtësia që është bërë, është shumë e madhe. Ligji 108/2018 paraqet një sërë problemesh. Sqarojmë se Emiljano Shullazi ka në paraburgim plot 4 vjet e 3 muaj, në dy vjet e gjysmë ka qenë i punësuar në Bibliotekën e Burgut, nuk ka asnjë vërejtje apo masë disiplinore për shkelje të rregullores ndaj tij. Si ta shpjegojmë që ky individ ka respektuar me përpikmëri rregulloren nga njëra anë dhe një ditë të bukur me diell, si rrufe në qiell të pastër, u bë ‘Armiku Publik’, që duhej patjetër të izolohej në regjimin e posaçëm 41-bis?!”, shkruan avokati.