Benjamin Netanyahu bëri deklaratën e tij të parë pas tentativës për sulm me dron në shtëpinë e tij në Cezare, të shtunën në mesditë. Në një video të postuar në Twitter, si në hebraisht ashtu edhe në anglisht, kryeministri izraelit, duke shëtitur nëpër një park, pyetet nga gazetarët: “Kryeministër, a do të të ndalojë ndonjë gjë?” Ai përgjigjet me një ton të vendosur: “Jo, asgjë nuk do të na ndalë, do të vazhdojmë deri në fitore.”

Netanyahu theksoi se dy ditë më parë, Izraeli kishte eliminuar vrasësin masiv, liderin e Hamasit, Yahya Sinwar. Ai përshkroi situatën aktuale si një “luftë ekzistenciale” dhe shprehu angazhimin për të vazhduar luftën deri në fund. “Dua të them diçka tjetër, unë jam krenar për ushtarët tanë, jam krenar për komandantët tanë dhe jam krenar për ju, qytetarët e Izraelit,” shtoi ai.

Në versionin e tij në anglisht, Netanyahu e quajti Sinwar “organizatorin terrorist” dhe e akuzoi atë për krime të rënda, duke thënë se banditët e tij “ua prenë kokën burrave tanë, përdhunuan gratë tona dhe dogjën të gjallë foshnjat.” Kryeministri u shpreh se “ne e neutralizuam atë” dhe do të vazhdojnë betejën e tyre me “përfaqësuesit e tjerë terroristë të Iranit”.

Sipas mediave arabe, një burim nga zyra e kryeministrit izraelit tha se “Irani ishte ai që tentoi ta vriste atë”. Zyra e kryeministrit në Izrael konfirmoi se rezidenca private e Benjamin Netanyahu në Cezare ishte objektivi i një sulmi me dron nga Libani më herët këtë mëngjes. Në një deklaratë të shkurtër, zyra tha se kryeministri Netanyahu dhe gruaja e tij, Sara, nuk ishin në shtëpi në momentin e sulmit dhe se nuk kishte të lënduar nga incidenti.