Kryeministri izraelit Benjamin Netanyahu ka deklaruar se lufta kundër Hamasit do të vazhdojë, pavarësisht kritikave ndërkombëtare për një sulm ajror që vrau shumë palestinezë në Rafah të dielën. Netanyahu u shpreh se “Unë nuk kam ndërmend ta përfundoj luftën përpara se të arrihet çdo qëllim”.

Mediat ndërkombëtare raportojnë për 7 të vdekur dhe 6 të plagosur, ndërsa sipas Ministrisë së Shëndetësisë të drejtuar nga Hamasi, sulmi i të dielës rezultoi në 45 të vdekur dhe qindra të plagosur. Pavarësisht thirrjeve për ndalimin e dhunës, ushtria izraelite ka vijuar me bombardimet në Rafah.

Mediat izraelite raportojnë se tanket izraelite ndodhen në qendër të Rafahut, ndërsa Agjencia e Kombeve të Bashkuara për Refugjatët Palestinezë (UNRWA) thotë se në 3 javët e fundit 1 milion palestinezë janë larguar nga Rafahu.

Në një zhvillim të rëndësishëm, ministrat e Jashtëm të BE-së janë mbledhur për të diskutuar mbi sanksionet kundër Izraelit nëse ai nuk respekton të drejtën ndërkombëtare humanitare, sipas ministrit të Jashtëm irlandez Micheal Martin. Gjykata Ndërkombëtare e Drejtësisë (ICJ) vendosi të premten që Izraeli duhet të ndalojë menjëherë ofensivën e tij në Rafah dhe të hapë kalimin kufitar për të lejuar ndihmat humanitare të hyjnë pa pengesa.

Këshilli i Sigurimit i OKB-së do të mbajë sot një takim urgjent me kërkesë të Algjerisë për të diskutuar situatën e rënduar në Rafah. Kjo mbledhje vjen në një kohë kur tensionet ndërkombëtare janë në rritje dhe thirrjet për ndalimin e dhunës po bëhen gjithnjë e më të zëshme.