GJILAN – Fotot e tij në “Instagram” tregojnë makina luksoze Range Rover dhe BMW X5, darka me njerëz të pushtetshëm dhe citate motivuese për “forcën” dhe “rrugën drejt suksesit”. Por pas imazhit të kuruar me kujdes, Mefail Shkodra kishte një dosje të trashë penale, e mbushur me akuza për fajde, shantazh dhe dhunë.

Të martën, 10 gusht 2025, emri i tij u rikthye në qendër të lajmeve, pasi akuzohet si autor i një vrasjeje të trefishtë në Gjilan. Në kërkim janë shpallur edhe djemtë e tij, Engjull dhe Edonis Shkodra, ndërsa një bashkëpunëtor u arrestua në vendngjarje. Burime nga policia thonë se përplasja ka nisur për shkak të borxheve nga fajdetë.

Shkodra nuk e kishte problem ta shfaqte jetën e tij luksoze. Në postimet e tij figurojnë takime me presidenten Vjosa Osmani, kryeministrin Albin Kurti, ministrin e Brendshëm Xhelal Sveçla, kryetarin e Prishtinës Përparim Rama dhe liderin e AAK-së Ramush Haradinaj. Mes fotove të makinave dhe udhëtimeve, ai postonte edhe fraza si:

“Njerëzit e fortë rrallë kanë një të kaluar të lehtë”
“Nëse ndalesh sa herë që një qen leh, nuk e mbaron kurrë rrugën tënde”

Por historia e tij me ligjin është e gjatë. Në qershor 2024, ai dhe djali i tij u arrestuan me dyshimet për fajde dhe kërcënime, duke i shkaktuar një viktime dëm mbi 600 mijë euro. Gjatë bastisjes, policia gjeti armë dhe mijëra euro cash. Ai u lirua në tetor të po atij viti pas katër muajsh paraburgim.

Dosja e tij përfshin pesë raste për sulm, tri për fajde, dy për prishje të rendit dhe qetësisë, si dhe akuza për mashtrim, kërcënim, shantazh dhe pjesëmarrje në grup kriminal.

Ndërkohë që policia e Kosovës vijon kërkimet për djemtë e tij, qytetarët në Gjilan janë të tronditur nga përmasat e dhunës dhe lidhjet e mundshme mes botës së krimit dhe figurave publike.