****

Një ngjarje e rëndë është shënuar në lagjen Teisseire të Grenoble, Francë, të dielën, ku një shqiptar i armatosur me pistoletë ka hapur zjarr mbi një grup prej tre personash, të gjithë shqiptarë.

Viktima nga ky incident është Ylli Bezhani, 47 vjeç, i cili ka marrë 5 plumba në trup dhe ka humbur jetën për shkak të plagëve të marra. Në këtë ngjarje, i biri i viktimës, 24 vjeç, dhe nipi 21 vjeç, së bashku me një tjetër shqiptar, kanë mbetur të plagosur rëndë.

Ngjarja ndodhi pak para orës 20:00 në një zonë të qetë të qytetit, rreth 100 metra larg nga kryqëzimi me Avenue Paul-Cocat. Autori, i cili lëvizte me një skuter elektrik, ka hapur zjarr drejt shqiptarëve, duke shkarkuar karikatorin e tij dhe më pas është larguar menjëherë nga vendi i ngjarjes.

Policia është në kërkim të autorit, por deri tani nuk ka asnjë informacion për identitetin e tij. Prokurori i Grenoble, Eric Vaillant, ka njoftuar se është hapur një hetim për “vrasje” dhe “tentativë vrasjeje”. Ngjarja ka tronditur komunitetin dhe ka nxitur shqetësime për sigurinë në atë zonë. Autoritetet po vazhdojnë hetimet për të zbuluar motivet dhe për të kapur autorin e këtij krimi të rëndë.