Ngjarje e rëndë në Mirditë: Humb jetën 51-Vjeçari gjatë riparimit të një ekskavatori

Një ngjarje tragjike ka ndodhur sot në Mirditë, ku një 51-vjeçar, banues në fshatin Malaj, ka humbur jetën në mënyrë aksidentale. Policia raportoi se viktima, shtetasi F.P., është dërguar pa shenja jete në spital, pasi ishte përfshirë në një incident gjatë punës në një ofiçinë në Spaç.

Sipas hetimeve paraprake, F.P. kishte shkuar në ofiçinën e administruar nga kushëriri i tij, shtetasi P.P., për të riparuar një ekskavator. Gjatë procesit të ndërrimit të transmisionit të mjetit, kriku që mbante transmisionin është këputur dhe ka goditur F.P., duke shkaktuar humbjen fatale të jetës së tij.

Grupi hetimor vazhdon punën për të zbardhur rrethanat e ngjarjes dhe për të përcaktuar detajet që çuan në këtë aksident tragjik.