Një incident i rëndë ka ndodhur sot në kryeqytet, ku një punonjës i Gardës së Republikës, Henri Haxhiaj, ka tentuar të vrasë veten duke përdorur armën e shërbimit. Ngjarja është regjistruar në banesën e tij, e cila ndodhet në zonën e Qytetit Studenti.

Sipas informacioneve paraprake, gardisti është transportuar menjëherë në spital me ambulancë dhe po i jepet ndihma mjekësore e nevojshme. Ende nuk janë bërë të qarta arsyet që e shtynë 37-vjeçarin të kryente këtë akt tragjik.

Në një deklaratë të policisë thuhet: “Më datë 15.10.2024, në Qytet Studenti, në banesën e tij, ka qëlluar veten me armë zjarri, shtetasi H. H., rreth 37 vjeç, punonjës i Gardës së Republikës. 37-vjeçari është dërguar në spital për ndihmë mjekësore, ndërsa grupi hetimor po punon për sqarimin e rrethanave të ngjarjes.”

Sipas informacioneve shtesë, familjarët e tij kanë deklaruar se viktima vuante nga depresioni, por nuk është konfirmuar nëse ishte nën trajtim të rregullt mjekësor. Hetimet vazhdojnë për të zbardhur shkaqet e ngjarjes.