Kryeministri Edi Rama dhe Ministrja e Shëndetësisë dhe Mbrojtjes Sociale, Albana Koçiu, morën pjesë në inaugurimin e Spitalit të Pediatrisë së Përgjithshme në Qendrën Spitalore Universitare “Nënë Tereza” (QSUNT). Gjatë fjalës së tij, Rama theksoi rëndësinë e përmirësimit të sistemit shëndetësor dhe adresimit të problematikave të mbetura, duke vënë theksin te nevoja për të nxjerrë mësime nga e kaluara për të shmangur raste të ngjashme me skandalin e Onkologjikut.

Në këtë kontekst, ai solli një shembull nga Zvicra, ku sipas tij, një situatë e ngjashme kishte ndodhur në departamentin e kardiokirurgjisë. Ai përmendi se skandali në këtë sektor çoi në pastrimin e personelit për shkak të përfshirjes së tij në afera korruptive me kompani që furnizonin aparatura mjekësore.

“Kemi ende probleme për të adresuar, por jemi të gjithë të vëmendshëm që mësimet e hidhura të së shkuarës të na vlejnë dhe ngjarje si ajo e onkologjikut të mos përsëriten. Por kjo është një betejë e përditshme, jo vetëm shqiptare. Në Davos mësova rastin e kardiokirurgjisë në Zvicër që pak kohë më parë ishte përfshirë në një skandal që pasoi një pastrim të personelit për shkak të ngjarjeve korruptive me kompanitë lidhur me aparaturat mjekësore. Shpesh ndodhemi në situata sikur biem nga qielli, por kjo është një përpjekje e gjithanshme dhe e përditshme”, deklaroi Rama.

Inaugurimi i Spitalit të Pediatrisë së Përgjithshme është pjesë e reformave në shëndetësi, ndërsa pritet të përmirësojë ndjeshëm cilësinë e shërbimit për fëmijët që kanë nevojë për trajtim mjekësor të specializuar.