Një ngjarje tronditëse ka ndodhur në Vlorë, ku është gjetur i vdekur shtetasi Bashkim Durmishi, 68 vjeç. Trupi i tij është zbuluar në banesën e tij, në lagjen “10 Korriku”, dhe dyshohet se ka pësuar dhunë fizike para vdekjes. Burimet e para bëjnë me dije se 68-vjeçari është gjetur i dhunuar, i zhveshur dhe me dëmtime të dukshme, ndërsa trupit të tij i është nënshtruar një grabitje, pas së cilës ka ndodhur vrasja.

Megjithatë, pas kqyrjes së vendit të ngjarjes, Policia e Vlorës ka raportuar se, për shkak të dëmtimeve në nofull, dyshohet që Durmishi ka pësuar një arrest kardiak si shkak i ndodhisë fatale. Autoritetet kanë nisur një hetim të plotë për të zbardhur rrethanat dhe shkaqet e ngjarjes dhe për të identifikuar autorin ose autorët, nëse kemi të bëjmë me një vrasje.

Trupi i 68-vjeçarit do të dërgohet për ekspertizë mjekoligjore për të përcaktuar më saktësisht shkakun e vdekjes dhe dëmtimet që ai ka pësuar në fytyrë. Forcat e Sigurisë Kombëtare dhe Policia e Vlorës kanë ngritur një post-bllok në dalje të qytetit dhe po ushtrojnë kontrolle të rrepta mbi automjetet e dyshimta në lidhje me ngjarjen.

Policia e Vlorës pritet të lëshojë një tjetër komunikatë për mediat për të dhënë detaje më të plota mbi këtë ngjarje tragjike dhe hetimet që po vijojnë.