Kryetarja e Kuvendit, Lindita Nikolla, priti sot paradite Sekretarin e Përgjithshëm të Ligës Botërore Myslimane, Dr. Mohamed Abdelkarim Al-Iss.

Në takim, Kryetarja Nikolla theksoi se Shqipëria vlerëson kontributin e Ligës Botërore Myslimane, shikuar si një organizatë ndërkombëtare humanitare. Ajo theksoi se organizata promovon miqësinë mes njerëzve dhe ka ndërmarrë përpjekje për të zgjeruar urat e dialogut dhe bashkëpunimit me të gjitha kombet, komunitetet, kulturat dhe qytetërimet. Kryetarja Nikolla vlerësoi gjithashtu harmoninë dhe tolerancën në bashkëjetesën fetare në Shqipëri, duke e cilësuar si një model pozitiv.

Kryetarja e Kuvendit tha: “Komunitetet fetare dhe besimtarët shqiptarë jetojnë në harmoni, mirëkuptim e tolerancë dhe këto janë ndër vlerat më të çmuara të Shqipërisë, të njohura dhe të vlerësuara botërisht. Mozaiku fetar i Shqipërisë është një pasuri për vendin dhe një model bashkëjetese për të gjitha vendet. Komuniteti mysliman i Shqipërisë, një komunitet progresist dhe tolerant, kontribues për zhvillimin, demokracinë dhe harmoninë fetare në Shqipëri.”