Ditën e sotme do të nisnin zyrtarisht procedurat për zgjedhjen e presidentit të ri të Republikës, ku do të përcaktohet dhe axhenda për raundet e votimit në Kuvend.

Ashtu siç edhe ishte paralajmëruar, Konferenca e Kryetarëve do të nisë në orën 12:30 , me praninë e kryetarëve të grupeve parlamentare.

Grupi i punës i ngritur nga Partia Socialiste ka mbledhur propozimet e deputetëve për presidentin me zarfin e famshëm me 3 emra, ndërsa nëpërmjet një e-maili zyrtar edhe qytetarët po shprehin kandidaturat e tyre.

Mazhoranca ka kryer konsultime me krerët e grupeve të tjera, përveç atij të Partisë Demokratike, për shkak të krizës së brendshme në parti. Enkelejd Alibeaj në cilësinë e kreut të grupit parlamentar është shprehur se PD nuk duhet ta përjashtojë veten nga procesi i zgjedhjes së presidentit, ndërkohë që nga ana tjetër Sali Berisha ka deklaruar se çdo negociatë me Ramën legjitimon pushtetin e tij.

Deri në raundin e tretë palët mund të votojnë një emër konsensual. Nëse deri në raundin e tretë nuk votohet ky emër atëherë mazhoranca mund ta zgjedhë e vetme me 71 vota në raundin e 4-të dhe të 5-të.

Kryeministri Rama ka përjashtuar mundësinë që presidenti i ri të jetë nga grupi parlamentar i Partisë Socialiste ndërsa deri më tani asnjë prej grupeve parlamentare nuk ka mbështetur publikisht një kandidat të caktuar.