Sot është parashikuar nisja e vitit të ri akademik për studentët në universitetet publike shqiptare. Por pedagogët prej ditësh kanë deklaruar se nuk do të nisin këtë vit të ri akademik nëse qeveria nuk merr parasysh kërkesat e tyre për rritje ë pagave deri në nivelin 50% me mundësinë e vetme për negocim sa i takon kohës kur mund të bëhen rritjet prej 30 dhe më pas 20%.

Ditën e sotme pedagogët kanë paralajmëruar protestë brenda korridoreve të universiteteve të vendit.

Në protestën e tyre të fundit ata njëzëri deklaruan se përderisa kërkesat e tyre nuk ishin përmbushur, do të ndërmerrnin masën drastike për të mos nisur punën në vitin e ri akademik.

Të shtunën nëpërmjet një letre drejtuar dekanëve, sindikata e pedagogëve, kërkoi që drejtuesit e universiteteve t’i mbështesnin në kauzën e tyre.
Mbështjetje pedagogët kanë kërkuar edhe nga studentët, duke u shprehur në media se e gjithë kjo bëhej për ta, që t’u ofrohej një shërbim sa më cilësor dhe që diplomat e tyretë kishin vlerë në perëndim.

Nga ana tjetër, qeveria, ka njoftuar se pedagogët do të kishin një rritje për 8% në rrogat e tyre, ndërsa një rritje prej 7% të mundësohej nga vetë universitetet. Kjo është kundërshtuar me forcë nga profesorët duke deklaruar se do t’i qëndronin vetëm kërkesës për rritje prej 50%.