Masat ajrore të nxehta e të thata me origjinë nga Afrika e Veriut që kanë goditur edhe Shqipërinë do të bëjnë që këtë javë të përjetojmë temperatura “të çmendura” të cilat do të arrijnë deri në 43 gradë.
Kjo javë ka nisur me temperatura të larta në vendin tonë. Ditën e sotme, temperatura më e lartë do të jetë 35 gradë Celsius në zonat bregdetare.
Ndërsa ditët në vijim parashikohet akoma më shumë rritje. Sipas Meteoalb, ditët më të nxehta të kësaj jave janë e enjtja dhe e premtja.
Sa i përket kryeqytetit, do të ketë rritje duke nisur nga e mërkura, kur temperatura do të arrijë në 40 gradë, ndërsa të enjten e të premten do të arrijë në 42 gradë celsius.
Ndërkohë, pushuesit kanë nisur të frekuentojnë plazhet. Dita e diel solli trafik të rënduar dhe bregdet të populluar, sidomos në Velipojë dhe Durrës, ku pushuesit ishin nga Shqipëria dhe Kosova.
