Kreu i Grupit të Partisë Demokratike, Gazment Bardhi, ka shprehur qëndrimin e tij mbi vendimin e fundit të Gjykatës Kushtetuese për kryedemokratin Sali Berisha, duke theksuar se masa e arrestit në shtëpi është antikushtetuese dhe e panevojshme.

Sipas Bardhit, Berisha ka mbrojtur Kushtetutën dhe precedentët e vendosur nga Kuvendi në raste të mëparshme, si rasti “Tahiri”, ku u autorizua prokuroria për masa më të lehta sigurie si “detyrim paraqitje” apo “ndalim i daljes jashtë vendit”.

“Kam një qëndrim thelbësisht të ndryshëm me Gjykatën Kushtetuese për nevojën e autorizimit nga Parlamenti kur kufizohet liria e lëvizjes së një deputeti. Megjithatë, vendimi i djeshëm konfirmon atë që kam thënë prej fillimit: masa e arrestit në shtëpi ndaj Sali Berishës është e panevojshme, joproporcionale dhe antikushtetuese. Nëse ‘ndalimi i daljes jashtë vendit’ është konsideruar i panevojshëm dhe joproporcional, atëherë masa më e rëndë e arrestit në shtëpi është shumëfish më e tillë,” shprehet Bardhi.

Ai theksoi se masat e sigurimit nuk duhet të trajtohen si ndëshkime, pasi në fazën e hetimit çdo individ prezumohet i pafajshëm. Sipas tij, këto masa nuk duhet të pengojnë një të zgjedhur që të ushtrojë mandatin e tij kushtetues.

Në dritën e vendimit të Gjykatës Kushtetuese, Bardhi i kërkon SPAK-ut dhe GJKKKO-së të revokojnë menjëherë masën e arrestit në shtëpi ndaj Berishës, duke e cilësuar atë si pengesë antikushtetuese për aktivitetin politik të kryetarit të opozitës dhe si ndërhyrje brutale ndaj demokracisë.

“326 ditë pengesë janë të mjaftueshme për të mos lejuar që kjo të vazhdojë më tej. Çdo vonesë e mëtejshme do të përbënte një ndërhyrje flagrante ndaj barazisë së palëve në zgjedhjet e ardhshme parlamentare dhe një akt sulmi politik ndaj opozitës,” përfundon Bardhi.