Episodi i fundit i podcastit të kryeministrit Edi Rama nxjerr në pah një aspekt të papritur: kryeministri nuk është vetëm në rolin e intervistuesit, por edhe i intervistuar. Në një bisedë të gjatë me pedagogun Mark Marku, Rama shpreh mendimin se koha e drejtësisë politike ka përfunduar dhe shpalos arsyet përse do të kërkojë shqiptarëve besimin për një mandat të katërt.

Pjesë nga biseda:

Mark Marku: Do të shfaqesh pas një viti në zgjedhje, 3 mandate, me të mirat e të këqijat e tyre. Në një qeverisje të gjatë, disa probleme themelore rëndojnë, korrupsioni, emigracioni i gjeneratave të reja. Çfarë do tu thuash shqiptarëve për mandatin e katërt? A do të vazhdojmë kështu si deri tani apo do të bëjmë ndryshime?
Edi Rama: Kështu si jemi, do të vazhdojmë kështu. Përpiqem të mos e them asnjëherë ndryshe. Unë them po, ne mund të mos jemi më të mirët, por më mirë se ne nuk ka. Nëse ndihem i kënaqur, nuk ka më motiv, prandaj në këtë aspect besoj dhe shpresoj se nuk jam në rrezik.

Ne e dimë që kemi probleme, është e kotë t’i mohojmë, por ne kemi dhënë këtij vendi një mundësi që nuk e ka pasur më parë. Një drejtësi që vepron e pavarur nga pushteti politik. Kemi pasur ministrash të pushkatuar edhe më përpara, por ka qenë me vullnet politik dhe drejtësia ka qenë pushka për t’i përballuar ata. Kemi një moment shumë të rëndësishëm të ndryshimit, sa është inkurajues dhe fragjil, dhe garantimi i paprekshmërisë së procesit është i domosdoshëm. Nga ana tjetër, lufta kundër korrupsionit nuk është thjesht lufta e drejtësisë, por një luftë për të pasur në të gjithë frontin e institucioneve një solidaritet dhe kapacitet për ta luftuar…

Rama gjithashtu tregon se një fushë ku sheh mundësi për të punuar më fort, ku edhe korrupsioni është i përhapur, janë prokurimet publike.

Për të gjithë kritikat që ka marrë për sulmet e tij ndaj mediave dhe gazetarëve, Rama pranon disa gabime të veta. Në anën tjetër, Marku u ndal në situatën në PD, duke theksuar degradimin e opozitës dhe sugjeruar që lideri i saj, Lulzim Basha, të tregojë profilin e një lideri që qeveris.