Një nga sendet më të rralla të zbuluara ndonjëherë në Tokë pritet të ngjallë interes të jashtëzakonshëm në ankandin e së mërkurës që do të mbahet në New York. Bëhet fjalë për një meteorid 25 kilogramësh, të quajtur NWA 16788, që besohet të jetë fragmenti më i madh i Marsit i gjetur ndonjëherë në planetin tonë.

Shtëpia prestigjioze e ankandeve Sotheby’s e ka vlerësuar çmimin e tij nga 2 deri në 4 milionë dollarë, duke e cilësuar si një objekt me vlerë të jashtëzakonshme shkencore dhe historike. Meteoridi me ngjyra të theksuara kuqërremta, kafe dhe gri besohet se është flakur nga sipërfaqja e Marsit pas një goditjeje të fuqishme nga një asteroid, përpara se të udhëtonte rreth 225 milionë kilometra në hapësirë për të përfunduar në shkretëtirën e Saharës, në Niger, në nëntor të vitit 2023.

Sipas të dhënave të Sotheby’s, ky shkëmb përbën 7% të të gjithë materialit marsian të njohur në Tokë dhe është 70% më i madh se fragmenti i dytë më i madh marsian i zbuluar ndonjëherë. Testimet laboratorike kanë treguar se ai përputhet në mënyrë të përkryer me përbërjen e shkëmbinjve marsianë të analizuar nga sonda “Viking” në vitin 1976.

Por ky nuk është i vetmi objekt që do të dalë në ankand. Një tjetër zbulim mbresëlënës është skeleti i një Ceratosauri të ri, një dinozaur mishngrënës që ka jetuar rreth 150 milionë vite më parë. Skeleti, i cili është mbi 2 metra i lartë dhe 3.5 metra i gjatë, është zbuluar në vitin 1996 në Wyoming të SHBA-së dhe është rikonstruktuar me përpikmëri nga paleontologët.

Të dy këto objekte janë pjesë e ankandit special të “Javës së Geek-ut 2025” në Sotheby’s, një ngjarje që mbledh në një vend fosile, meteorë dhe minerale të rralla që i përkasin epokave më të largëta të historisë së Tokës dhe hapësirës.

Interesi në rritje për historinë natyrore dhe objektet e rralla shkencore po tërheq gjithnjë e më shumë koleksionistë, të cilët janë të gatshëm të paguajnë miliona për një copëz nga universi – apo nga koha e dinozaurëve.