Ministrja për Europën dhe Punët e Jashtme e Shqipërisë, Olta Spiropali, ka uruar sot Kosovën në 18-vjetorin e shpalljes së Pavarësisë, duke theksuar rëndësinë e sakrificës dhe vendosmërisë së popullit kosovar.

Në një postim në Facebook, Spiropali shkruan se kjo është një ditë që kujton qëndresën dhe vendimin për të jetuar i lirë, duke theksuar se rruga drejt shtetit të Kosovës ka qenë e vështirë, por e drejtë, dhe se sot Kosova është një realitet i pakthyeshëm.

Ministrja thekson se vendi vazhdon të ecë përpara me institucione të konsoliduara, demokraci në zhvillim dhe orientim euroatlantik, ndërsa Shqipëria qëndron pranë Kosovës si motër dhe aleate, duke mbështetur sigurinë, zhvillimin dhe të ardhmen europiane.

“Urime nga zemra për qytetarët e Kosovës dhe për të gjithë ata që e bënë të mundur këtë ditë”, përfundon urimi i Spiropalit.