Gjykata e Krimeve të Rënda në Bruksel ka dhënë vendimin e saj ndaj bosit të mafies Franc Gergely, i njohur si Franc Çopja, duke e dënuar me 25 vjet burg për vrasjen e Ardit Spahiut më 27 nëntor 2020 në Molenbeek.

Sipas gjykatës, Gergely kishte urdhëruar vrasjen nga Dubai, ndërsa personi tjetër që urdhëroi atentatin, Mikael Qosja, u dënua me burgim të përjetshëm. Autori i drejtpërdrejtë i vrasjes, Flobenc Meçja, gjithashtu mori burgim të përjetshëm.

Gjykata vendosi edhe dënime për bashkëpunëtorët:
• Elton Roci – 20 vjet burg
• Elvis Murataj – 8 vjet burg
• Eljo Bitri – 5 vjet burg, për shkak të bashkëpunimit dhe rrëfimeve të tij gjatë hetimit, duke përfituar statusin e dëshmitarit të mbrojtur.

Spahiu, 38 vjeç, kishte ikur në Belgjikë në vitin 2019 për shkak të kërcënimeve ndaj jetës në Shqipëri. Hetimet zbuluan se vrasja ishte pjesë e konflikteve midis klanit të Çopjas dhe familjes Alibej, të dy të përfshirë në trafikimin e kokainës.

Ngjarja ndodhi te Condorlaan, ku Spahiu u qëllua nëntë herë, duke marrë tetëmbëdhjetë plagë, dhe vdiq në vend. Hetimet u ndihmuan nga dekriptimi i mesazheve të koduara Sky ECC në qershor 2021. Gergely u ekstradua nga Emiratet e Bashkuara Arabe në Belgjikë në dhjetor 2023, duke pretenduar se ishte në Dubai për tregti tekstilesh dhe makinash.