Një velierë me tre persona në bord ka lëshuar sinjalin SOS mbrëmjen e djeshme për shkak të moti të përkeqësuar dhe detit të trazuar me dallgë të forta. Ngjarja ka ndodhur në zonën mes ishullit të Sazanit dhe gadishullit të Karaburunit, një zonë e njohur për rrezikshmëri në kushte të motit të keq.

Menjëherë pas sinjalit të emergjencës, Policia Kufitare e Vlorës ka ndërhyrë dhe ka shoqëruar velierën drejt zonës së Tri Portit, duke garantuar shëndetin dhe sigurinë e personave në bord, të cilët sipas burimeve zyrtare ndodhen në gjendje të mirë shëndetësore.

Kjo është rast i dytë brenda një periudhe të shkurtër që autoritetet shqiptare ndërhyjnë për të shpëtuar veliera në vështirësi në det. Pak kohë më parë, dy shtetas të huaj që lundronin në një tjetër velierë, u shpëtuan nga Policia Kufitare dhe Roja Bregdetare, pasi veliera e tyre pësoi defekt në motor dhe mbeti rreth 5 milje në det të hapur, përballë Gjirit të Gramës.

Këto ndërhyrje të shpejta dhe efektive tregojnë gatishmërinë e autoriteteve kufitare dhe detare shqiptare për të përballuar situatat emergjente në det, sidomos në sezonin turistik dhe në periudha me kushtet e paqëndrueshme atmosferike.