Në Mianmar, ekipet e shpëtimit po luftojnë me kohën për të nxjerrë të mbijetuarit nga rrënojat e tërmetit katastrofik me magnitudë 7.7 ballë, që ka lënë pas një tragjedi të madhe. Të paktën 1.644 persona janë konfirmuar të vdekur, ndërsa shumë të tjerë ndodhen ende të bllokuar.

Në rajonin e Mandaleit, dëshmitarët përshkruajnë skena tronditëse: “Njerëzit po gërmojnë me duar për të larguar rrënojat”, tha një qytetar për BBC.

Ekipet e shpëtimit kanë arritur të nxjerrin disa të mbijetuar, mes tyre edhe një fëmijë që po pëshpëriste për ujë. “I dhashë një tub të vogël që të mund të arrinte ujin përmes mbeturinave”, tregoi një shpëtimtar.

Situata në spitale është alarmante. “Edhe kur i çojmë të plagosurit në spital, nuk mund t’i trajtojnë. Nuk ka energji elektrike, nuk ka ujë”, u shpreh një tjetër dëshmitar. Mungesa e karburantit e ka bërë të pamundur funksionimin e pompave të ujit dhe transportimin e të lënduarve.

Tërmeti ka shkaktuar një katastrofë humanitare, ndërsa autoritetet dhe organizatat ndërkombëtare po përpiqen të dërgojnë ndihma urgjente në zonat më të goditura.