Liderja e opozitës venezueliane, Maria Corina Machado, fituese e Çmimit Nobel për Paqen 2025, mungoi sot në ceremoninë zyrtare të dorëzimit të medaljes në Oslo.

Në emër të saj, medaljen dhe certifikatën prestigjioze i pranoi vajza, Ana Corina Sosa Machado, gjatë ceremonisë së zhvilluar në bashkinë e kryeqytetit norvegjez.

Komiteti Norvegjez i Nobelit e shpalli Machadon fituese në tetor, duke e vlerësuar për angazhimin e saj të palëkundur në mbrojtje të të drejtave demokratike të popullit venezuelian—kauzë të cilës ajo ia dedikoi edhe këtë nderim.

Machado, e cila jeton në fshehtësi për shkak të persekutimit politik, është një prej kritikëve më të fortë të presidentit autoritar të Venezuelës, Nicolas Maduro. Prej javësh kishte pasur pasiguri nëse ajo do të mund të udhëtonte e sigurt drejt Norvegjisë për të marrë pjesë në ceremoninë e 10 dhjetorit, datë që përkon me përvjetorin e vdekjes së Alfred Nobelit.

Instituti Nobel njoftoi sot në mëngjes se Machado nuk do të ishte e pranishme në ceremoni. Megjithatë, pak më vonë u bë e ditur se pritet të mbërrijë në Oslo, ndoshta brenda ditës.

Në një intervistë të publikuar në X (ish-Twitter) pak para nisjes së ceremonisë, 58-vjeçarja konfirmoi se ishte rrugës drejt Norvegjisë, duke theksuar se ishte një vendim i vështirë, pasi pas kthimit në Venezuelë mund të përballet me pasoja serioze.

Machado mbetet një nga figurat më të rëndësishme të opozitës venezueliane, dhe marrja e çmimit Nobel shihet si një mesazh i fuqishëm ndërkombëtar në mbështetje të lirisë dhe demokracisë në vendin e saj.