Deputeti i Partisë Demokratike, Flamur Noka, shprehu sot në Kuvend kritika të forta ndaj Prokurorisë së Posaçme, duke vënë në dukje se raporti i OSBE/ODIHR ka faktuar ndikimin e shtetit në zgjedhje, përmes vendimeve si bonusi i pensioneve dhe falja e gjobave, dy ditë para 11 majit.

Sipas Nokës, SPAK nuk ka trajtuar këto çështje si vepra penale dhe nuk ka hetuar as kërcënimin e deputetes Albana Vokshi në ditën e zgjedhjeve.

“Pyetjet u bënë për qytetarët, nuk prisnim përgjigje sepse i dinim. OSBE/ODIHR konstaton shkelje ligji nga VKM-ja që miratoi kryeministri për bonusin e pensionistëve dhe faljen e gjobave, kurse Altin Dumani nuk sheh shkelje,” tha Noka.

Ai shtoi se patronazhistët shpërndanin para dhe favore në këmbim të votës në çdo qark, duke theksuar se SPAK nuk ka ndërmarrë veprime ndaj këtyre rasteve për shkak të “pavarësisë së partisë mbi ligjin”.

Debati erdhi pas raportimit të kreut të SPAK, Altin Dumani, për veprimtarinë e Prokurorisë së Posaçme gjatë vitit 2024.