E ftuar në “Grida Duma Podcast”, këngëtarja Fifi është ndalur sërish te marrëdhënia me Flori Mumajesin, duke lënë të kuptohet se distanca mes tyre vijon të jetë e njëjtë.

Artistja tha se aktualisht nuk ka asnjë informacion të drejtpërdrejtë për Florin dhe se përpjekjet për ta kontaktuar nuk kanë dhënë rezultat. Ajo pranoi se ka dëgjuar disa gjëra për të, por zgjodhi të mos u besojë fjalëve të të tjerëve pa komunikuar vetë me të.

“Unë nuk e di fare as ça bën Flori, as si është Flori, nuk kam informacion. Kam pyetur. Ca përgjigje që kam marrë s’më kanë pëlqyer, ca të tjera më kanë lënë neutrale”, u shpreh Fifi.

Ajo theksoi se nuk i merr si të mirëqena thashethemet që qarkullojnë, duke nënvizuar se e vërteta, sipas saj, mund të vijë vetëm nga një bisedë direkte.

“Pa folur me të, unë nuk i besoj askujt, sepse thuhen shumë llafe dhe dalin të mos jenë të vërteta”, shtoi këngëtarja.

Deklaratat e Fifit rikthejnë edhe një herë në vëmendje raportin e shumëpërfolur mes dy artistëve, i cili prej kohësh mbetet i paqartë për publikun.