Ministrja e Shtetit për Marrëdhëniet me Parlamentin, Elisa Spiropali, reagon ndaj sulmeve të Ilir Metës ndaj SPAK dhe Altin Dumanit, duke kërkuar nga opozita të dalë e të shprehet para Kuvendit për të qenë të qartë në lidhje me qëndrimin e tyre ndaj SPAK. Spiropali thekson se është koha që ata të kenë një qëndrim të hapur për dy liderët e tyre dhe të mos e shikojnë SPAK si organizatë kriminale, por si institucion të drejtësisë. Ajo akuzon opozitën për përdorimin e një gjuhe të dhunshme dhe sfidon ata të shprehen qartë në lidhje me këtë çështje.
“Ju që keni opinion për gjithçka dhe gjithëkënd, a keni ju një opinion për dy baballarët në majë të thanës ku jeni ngjitur të tërë. Njëri në majë të pallatit që bërtet kundër SPAK dhe tjetri në majën e dëlirit të madhështisë ku kafshon SPAK dhe kreun e SPAK nëpër ekrane e ku t’i dalë para. A keni ju një opinion për këto, meqë keni opinione për gjithçka, bëni prokurorin e gjyqtarin. Gjuhën e dalë nga binarët e mendjes së dy baballarëve në majë të thanës ju as nuk e përmendi, të dy presidentë të kësaj republike, dy kryeministra, të dy bela të këtij populli. Ju nuk mund as të shpreheni dhe vini këtu e doni të bëni sherr e rrëmujë dhe të na thoni njëherë e mire ca opinioni keni për ulërimat e tyre. Nuk janë dy kokë dele, por janë dy baballarët e opozitë suaj në emër të cilëve vini këtu e na drejtoni gishtin për drejtësinë, ju që jeni të zhytur kokë e këmbe, vetëm dy gishta jashtë. Ju mendoni se mund të hani thana në pemët e tyre dhe vilni votat në koshin e popullit. Duke i mbajtur të dy ata mbi supe siç mbanin shërbëtorët njëherë e një kohë mbretërit në ato karroca, vini këtu të mbani peng këtë kuvend me hallin e madh që ka gjet ata dy. Çohuni thoni qartë ca është SPAK organizatë kriminale, apo pjesë e institucioneve të reja të drejtësisë që po luftojnë pandëshkueshmërinë. Përgjigjja mos të jetë si hera e kaluar se kur SPAK godet Ramën është institucionet e drejtësisë e kur godet baballarët tuaj është organizatë kriminale”, tha Spiropali.
