Ish-presidenti francez, Nicolas Sarkozy, do të hyjë sot në qeli për të filluar një dënim me pesë vjet burg për komplot për të mbledhur fonde për fushatën e tij nga Libia.

Sarkozi, i cili udhëhoqi Francën nga 2007 deri në 2012, bëhet ish-udhëheqësi i parë francez që shkon në burg që nga Marshal Philippe Petain pas Luftës së Dytë Botërore.

“Nuk kam frikë nga burgu. Do ta mbaj kokën lart, edhe te portat e burgut,” tha Sarkozi për gazetën La Tribune Dimanche përpara se të hynte në qeli.

Ai pritet të mbahet në njësinë e izolimit, ku të burgosurit qëndrojnë në qeli të veçanta dhe ndahen gjatë aktiviteteve jashtë për arsye sigurie. Qelitë kanë sipërfaqe prej 9 deri 12 metrash katrorë dhe përfshijnë dushe private, ndërsa Sarkozi do të ketë akses në televizor dhe telefon fiks (për një tarifë mujore 14 euro).

Një nga djemtë e tij, Louis Sarkozy, bëri thirrje për një tubim mbështetës të martën në mëngjes në lagjen luksoze të Parisit ku jeton ish-presidenti.