Futbolli është një sport kolektiv, ku funksionimi i çdo hallke është vendimtar për suksesin e ekipit. Megjithatë, klubet me yje të mëdhenj shpesh përballen me tensione të brendshme, një situatë që duket se po shfaqet së fundmi te Borussia Dortmund.

Në qendër të polemikave është sulmuesi Karim Adeyemi, i cili sipas mediave gjermane është i pakënaqur që klubi nuk e transferoi gjatë merkatos së verës. Futbollisti thuhet se po ushtron presion ndaj drejtuesve për t’u larguar në afatin e janarit, ndërsa sjellja e tij e fundit ka ndezur alarmet në klub.

Gjatë fitores ndaj Borussia Mönchengladbach në Kupën e Gjermanisë, Adeyemi u zëvendësua në minutën e 60-të. Vendimi i trajnerit nuk u prit mirë nga lojtari, i cili, dukshëm i irrituar, refuzoi të përshëndeste shokët e ekipit dhe u drejtua menjëherë për në dhomat e zhveshjes.

Sjellja e tij nuk ka kaluar pa pasoja. Drejtori sportiv i Dortmundit, Sebastian Kehl, konfirmoi se klubi do ta ndëshkojë lojtarin. “Zëvendësimi i tij ishte plotësisht i justifikuar. Ai nuk luajti mirë dhe do të ndëshkohet për sjelljen e tij. Sigurisht që kemi tema për të folur pas gjithë kësaj. Nuk më pëlqeu reagimi i tij, ashtu si trajnerit dhe shokëve të ekipit”, u shpreh Kehl.

Situata rreth Adeyemit pritet të jetë një nga çështjet më të nxehta te “milionerët” në javët në vijim, ndërsa mbetet për t’u parë nëse klubi dhe lojtari do të gjejnë gjuhën e përbashkët apo ndarja në janar do të bëhet e pashmangshme.