Një 26-vjeçar është shpallur fajtor për vrasjen e të dashurës së tij, 31-vjeçares Zhe Wang, pas një konflikti të ashpër që nisi për jetën intime dhe përfundoi në një akt ekstrem dhune në juglindje të Londrës. Trupi i Wang u gjet i mbuluar nga gjaku në dhomën e saj të gjumit, ndërsa autori telefonoi shërbimet e emergjencës dhe raportoi “një incident me thikë”.
Sipas The Sun, çifti kishte vetëm gjashtë muaj lidhje, por marrëdhëniet e tyre intime ishin tensionuar nga standardet tepër të larta të pastërtisë së Wang, e cila vetëquhej “mikrofobe”. Ajo ishte obsesionuar nga një skuqje në lëkurë dhe e akuzoi partnerin se i kishte transmetuar infeksion. Madje, 31-vjeçarja i kishte thënë atij se “do të preferonte të vdiste sesa të merrte një infeksion”, ndërsa i kërkonte teste të përsëritura mjekësore.
Në ditën e krimit, autori, Michals, kishte shkuar në banesën e saj për ta qetësuar dhe për t’i çuar ushqim. Sipas dëshmisë së tij, një debat shpërtheu dhe Wang e sulmoi me thikë, gjë që e detyroi – sipas tij – t’ia rrëmbente dhe ta godiste në vetëmbrojtje. Por hetimet e rrëzuan këtë version.
Ekspertët zbuluan se ai e goditi dy herë me thikë në fytyrë dhe më pas e mbyti. Më pas u largua nga apartamenti, fshehu thikën, celularin e viktimës dhe ushqimin në një qese plehrash. Vetëm pasi foli me të atin dhe kërkoi këshilla ligjore, telefonoi ambulancën – shumë orë pas sulmit. Mjekoligjorët thanë se Wang ka mbetur gjallë 30 deri në 60 minuta pas goditjeve.
Michals mohoi vrasjen, duke këmbëngulur se kishte vepruar në panik dhe vetëmbrojtje. Mbrojtja e tij u financua privatisht nga familja, ndërsa prindërit udhëtuan nga SHBA për të ndjekur procesin gjyqësor. Por gjykata hodhi poshtë pretendimet e tij, dhe juria e shpalli fajtor për vrasje.
Prokurorja Henrietta Paget e cilësoi rastin si “një sulm brutal dhe të egër ndaj një gruaje të re, në dhomën e saj të gjumit”.
Zhe Wang, studente e masterit në Shkrim Kreativ dhe Edukim në Goldsmiths, kishte ambicie të bëhej mësuese dhe të vijonte doktoraturën. Shefat akademikë e përshkruan atë si një vajzë të qetë, të përkushtuar dhe shumë të talentuar — një jetë e prerë tragjikisht shkaku i dhunës në çift.
