Tiranë – I penduari i drejtësisë, Nuredin Dumani, u shtrua mbrëmjen e djeshme me urgjencë në reanimacionin e kardiologjisë në Qendrën Spitalore Universitare “Nënë Tereza”, por pas 24 orësh monitorimi është rikthyer në qelitë e paraburgimit.

Dumani iu nënshtrua një seri analizash të specializuara për të vlerësuar gjendjen e tij shëndetësore, pas problemeve të shfaqura me zemrën. Instituti i Mjekësisë Ligjore konfirmoi se nuk ka rezultuar përdorim i drogave apo alkoolit, ndërsa testimet për një eventual helmim do të kërkojnë kohë më të gjatë për rezultate përfundimtare.

Autoritetet theksuan se nuk ka pasur nevojë për ndërhyrje kirurgjikale, ndërsa rikthimi i tij në qeli u bë në kushte sigurie maksimale.

Nuredin Dumani është një nga bashkëpunëtorët më të rëndësishëm të drejtësisë në vend, i angazhuar në zbardhjen e shumë rasteve të grupeve të strukturuara kriminale dhe ngjarjeve të rënda. Deklaratat e tij kanë qenë kyçe për SPAK-un në shpërbërjen e disa nga organizatat më të fuqishme kriminale në Shqipëri.