Në seancën e zhvilluar në GJKKO, babai i Andi Malokut, i riut 23-vjeçar që u ekzekutua më 1 nëntor 2019, ka rrëfyer me lot momentet e fundit të jetës së të birit dhe komunikimin që pati me të pas plagosjes.

Genc Maloku ka treguar se ngjarjen e mësoi nga vetë i biri, i cili e telefonoi i plagosur dhe i tha: “Jam keq, o babë, më kanë qëlluar”. Sipas babait, Andi nuk kishte konflikte me askënd dhe nuk ishte objektiv i atentatit, pasi po shoqëronte prokurorin Arjan Ndojën dhe një person tjetër në automjet.

Ai ka theksuar se djali i tij kishte vetëm një muaj e pak që punonte si shofer jozyrtar i prokurorit, ishte i rregullt, nuk pinte duhan apo alkool dhe nuk ishte i përfshirë në asnjë aktivitet të dyshimtë.

Gjatë seancës, Maloku ka apeluar për drejtësi dhe ka kërkuar llogari për humbjen e djalit të tij:
“Mua më ka ikur djali 23 vjeç. Ma kthen ti dot djalin? Ma kthen?!”, është shprehur ai.

Ngjarja e 1 nëntorit 2019 ndodhi kur mjeti me të cilin udhëtonin Andi Maloku, prokurori Arjan Ndoja dhe Landi Muharremi u qëllua me breshëri plumbash nga një mjet tjetër në ecje. Andi Maloku ishte i vetmi që humbi jetën pas plagëve të marra në shpatull dhe shtyllën kurrizore.

Seanca e sotme nuk ka munguar tensioni, me përplasje verbale mes babait dhe të pandehurit Plarent Dervishaj.