Reperi amerikan Offset, emri i vërtetë Kiari Cephus, ka folur për herë të parë hapur rreth prapaskenave të ndarjes nga bashkëshortja e tij, Cardi B. Në një intervistë për programin “Baby, This Is Keke Palmer”, 33-vjeçari pranoi se gabimet e tij dhe tradhtia ishin ndër arsyet kryesore që çuan në përfundimin e martesës së tyre shtatëvjeçare.

“Absolutisht nuk isha perfekt në atë situatë. Bëra shumë gabime. Ka shumë gjëra që i bëra gabim, dhe ajo gjithashtu bëri gabime,” tha reperi, duke shtuar se ndarja përpara publikut e ka bërë procesin emocionalisht më të vështirë.

Offset pranoi se kishte marrë “vendime të këqija si burrë”, përfshirë tradhtinë, e cila ndikoi ndjeshëm në shkatërrimin e besimit mes tyre. Ai shtoi se pas ndarjes në korrik 2024, kuptoi se duhej të pranonte vendimin e Cardi B për të dhënë fund martesës.

Megjithatë, reperi theksoi se pavarësisht ndarjes, ata mbeten të bashkuar në një aspekt të rëndësishëm: përkushtimin ndaj fëmijëve të tyre. “Ne mund të mos jemi më bashkë si çift, por do të jemi gjithmonë bashkë si prindër,” u shpreh Offset.

Marrëdhënia e çiftit ka qenë shpesh në qendër të vëmendjes për shkak të luhatjeve dhe deklaratave publike, por kjo është hera e parë që reperi pranon përgjegjësinë për prishjen e martesës së tyre.