Policia e Romës ka zhvilluar një operacion të gjerë anti-drogë, duke çmontuar një organizatë kriminale që operonte në Itali, Shqipëri dhe Spanjë. Operacioni, i koordinuar nga Drejtoria e Qarkut Anti-Mafia (DDA), ka çuar në arrestimin e 27 personave, të cilët akuzohen për trafik droge, posedim dhe furnizim të lëndëve narkotike, zhvatje, armëmbajtje pa leje dhe regjistrim fiktiv të pasurisë.

Baza e shpërndarjes së drogës në një qendër pritjeje në Romë

Hetimet zbuluan se organizata kriminale përdorte Qendrën e Pritjes së Jashtëzakonshme në Via della Riserva Nuova në Romë si bazë për ruajtjen dhe shpërndarjen e drogës. Ky vend shërbente gjithashtu si një qendër rekrutimi për migrantët nigerianë, mbajtës të lejeve të përkohshme të qëndrimit, të cilët përfshiheshin në aktivitete të paligjshme.

Nga 27 të arrestuarit, 20 persona janë vendosur në arrest me burg, ndërsa 7 të tjerë në arrest shtëpie.

Droga transportohej nga Vlora dhe shpërndahej në të gjithë Europën

Sipas hetimeve të Karabinierëve të Kompanisë Rome Parioli, në bashkëpunim me Drejtorinë Qendrore të Shërbimeve Kundër Drogës, droga e trafikuar, kryesisht marijuanë, importohej nga Vlora dhe shpërndahej në të gjithë Europën falë një aleance mes grupeve kriminale shqiptare dhe nigeriane.

Për transportin e drogës, organizata përdorte mjetet e transportit publik, një metodë që ndihmonte në shmangien e kontrolleve policore.

Arrestime në Vlorë dhe Barcelonë

Mediat italiane raportojnë se falë bashkëpunimit të ngushtë me policinë lokale, Drejtorinë Qendrore të Policisë Kriminale dhe Interpolin, disa arrestime u kryen në Vlorë dhe në provincën e Barcelonës.

Operacioni konsiderohet një goditje e rëndësishme ndaj rrjeteve të trafikut ndërkombëtar të drogës, duke shkatërruar një skemë të fuqishme kriminale që vepronte në disa shtete europiane.