Fier – Policia e Shtetit ka kryer një operacion të gjerë në qarkun Fier, duke goditur një skemë mashtruese piramidale online që ka prekur dhjetëra qytetarë. Si rezultat, 6 persona u arrestuan dhe 2 të tjerë janë shpallur në kërkim, njoftoi kreu i policisë vendore Fier, Skënder Litaj.

“Ky operacion është rezultat i një hetimi disa mujor, i mbështetur mbi informacione të verifikuara dhe punë të specializuar hetimore,” tha Litaj gjatë një konferencë për media. Ai bëri të ditur se gjatë operacionit u kryen 83 kontrolle në qytetet Fier, Tiranë, Dibër, Berat dhe Gramsh, duke përfshirë persona, banesa dhe subjekte të lidhura me skemat mashtruese.

Hetimi zbuloi një rrjet individësh që promovonin platforma investimi të rreme, duke premtuar fitime të shpejta dhe duke përdorur kriptomonedha si USDT dhe TRON. “Përdorimi i kriptomonedhave nuk ishte rastësor – ato zgjidheshin për vështirësinë në gjurmim dhe perceptimin e gabuar si mjete të sigurta investimi,” shpjegoi Litaj.

Ai bëri apel te qytetarët:

“Mos besoni në ‘investime të sigurta’ që premtojnë fitim të menjëhershëm. Ato nuk janë mundësi investimi – janë mashtrime të strukturuara dhe të sofistikuara, ku gjithmonë humbin më të pambrojturit.”

Të arrestuarit janë: Arbër Çela, Emanuel Taullau, Flavio Mukaj, Marius Kodra, Brunilda Todi dhe Brunilda Ndini. Hetimi vazhdon për të identifikuar dhe ndëshkuar organizatorët kryesorë të skemës.