Vendimi i Shteteve të Bashkuara për të pezulluar Dialogun Strategjik me Kosovën është një reflektim i drejtpërdrejtë i pakënaqësisë së grumbulluar ndaj veprimeve të kryeministrit në detyrë, Albin Kurti – vlerëson Charles Kupchan, nga Këshilli për Marrëdhënie me Jashtë në Uashington.

“Kjo është një çështje serioze, sepse rajoni ka nevojë për më shumë angazhim nga SHBA-ja, jo për më pak,” tha ai për Radion Evropa e Lirë. Sipas tij, pezullimi është një sinjal presioni mbi udhëheqësit në Prishtinë për të vepruar në mënyrë konstruktive, për të formuar qeverinë dhe për t’u riangazhuar në dialogun me Serbinë.

Kupchan theksoi se pakënaqësia e Uashingtonit është rritur pas një sërë vendimesh të Kurtit, nga ndalimi i dinarit serb, te instalimi i kryetarëve shqiptarë në veri dhe moszbatimi i marrëveshjes për Asociacionin e komunave me shumicë serbe.

“Ka një perceptim të gjerë këtu në Uashington dhe në Evropë se Qeveria e Kosovës nuk po ndihmon në përmirësimin e situatës,” u shpreh ai, duke shtuar se SHBA-ja e sheh këtë si një paralajmërim të fortë.

Kupchan paralajmëroi se Kosova rrezikon të gjejë veten më të izoluar, në një kohë kur bota përballet me kriza të tjera madhore – nga lufta në Ukrainë, te Lindja e Mesme dhe tensionet me Kinën.

“Gjërja e fundit që na nevojitet është rritja e paqëndrueshmërisë në Ballkan,” tha ai.