Një 46-vjeçar është vënë në pranga nga Policia e Matit, pasi u kap duke qarkulluar me automjet në gjendje të dehur dhe i armatosur me armë zjarri tip pushkë.

Sipas njoftimit zyrtar, në kuadër të punës për goditjen e rasteve të armëmbajtjes pa leje dhe kapjen e personave që qarkullojnë të armatosur, shërbimet e Komisariatit të Policisë Mat, mbi bazën e informacioneve të siguruara në rrugë operative, organizuan dhe finalizuan operacionin policor të koduar “Aksi”.

Si rezultat i këtij operacioni, në aksin rrugor “Burrel–Komsi”, u ndalua automjeti tip “Volkswagen” me të cilin udhëtonte 46-vjeçari. Gjatë kontrollit fizik të mjetit, efektivët gjetën të fshehur dhe sekuestruan në cilësinë e provës materiale një armë zjarri pushkë.

Në përfundim të veprimeve procedurale, u arrestua në flagrancë shtetasi me iniciale V.N., 46 vjeç, banues në fshatin Drita, Burrel. Ai akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Drejtimi i automjetit në mënyrë të parregullt”.

Materialet procedurale i janë referuar Prokurorisë së Dibrës për veprime të mëtejshme.