Policia e Vlorës ka finalizuar me sukses operacionin policor të koduar “Epilogo”, për kapjen e një shtetasi të shpallur në kërkim ndërkombëtar për veprat penale të trafikimit të lëndëve narkotike. Shtetasi, Fredi Arshi (alias Alfred Arshiaj), 60 vjeç, banues në Vlorë, ishte dënuar nga autoritetet italiane me 11 vjet e 6 muaj burgim për pjesëmarrje në një grup kriminal të angazhuar në trafikimin e drogës.

Operacioni u realizua pas një pune të koordinuar mes Policisë së Shqipërisë, Interpol Tirana dhe Interpol Roma, dhe pas marrjes së informacionit nga inteligjenca policore, që identifikoi vendndodhjen e tij. Arshiaj u kap në lagjen “10 Korriku” në Vlorë dhe është arrestuar provizorisht për t’u ekstraduar në Itali.

Ky aksion i suksesshëm është rezultat i bashkëpunimit të ngushtë ndërmjet autoriteteve shqiptare dhe italiane për të luftuar krimin e organizuar dhe trafikun e narkotikëve.