Policia e Tiranës ka finalizuar operacionin e koduar “Flagranca”, duke vënë në pranga dy shtetas që tentuan të shisnin një armë zjarri në kryeqytet.

Në kuadër të operacionit, u arrestua në flagrancë 26-vjeçari P. B., i cili u kap me një armë zjarri pistoletë dhe një krehër me fishekë, të cilën dyshohet se do ta shiste. Ky shtetas ndodhej nën masën e sigurisë “Arrest në shtëpi” për veprën penale “Vjedhja”.

Gjithashtu, u arrestua edhe 37-vjeçari G. B. (S.), që dyshohet se ndihmonte 26-vjeçarin për shitjen e armës. Gjatë momentit të ndalimit në zonën e “Zogut të Zi”, ai kundërshtoi me dhunë punonjësit e policisë dhe tentoi të largohej.

Si rezultat i operacionit, u sekuestruan:

•Një armë zjarri pistoletë me krehër dhe municion luftarak;

•Tre celularë;

•Një automjet tip “Honda” me të cilin qarkullonin të dy shtetasit.

Hetimet vijojnë për të zbuluar nëse ka persona të tjerë të përfshirë në këtë aktivitet të paligjshëm. Materialet procedurale i kaluan Prokurorisë për veprime të mëtejshme.