Policia e Durrësit ka finalizuar me sukses operacionin e koduar “Ghost”, ku ka kapur dhe arrestuar një shtetas 28-vjeçar, i cili ishte në kërkim ndërkombëtar. Shtetasi, Ilirjan Mici, banues në fshatin Likmetaj të Durrësit, u arrestua me qëllim ekstradimin në Spanjë, ku akuzohet për pjesëmarrje në një organizatë kriminale që trafikon lëndë narkotike.

Mici ishte shpallur në kërkim nga autoritetet spanjolle, pasi Gjykata e Madritit kishte caktuar masën e sigurisë “Arrest në burg” për veprat penale të “Organizatës kriminale”, “Trafikimit të narkotikëve” dhe “Pastrimin e produkteve të veprës penale”. Për këto akuza, ai mund të përballet me një dënim deri në 26 vjet burgim.

Operacioni u realizua nga Shërbimet Operacionale të Drejtorisë Vendore të Policisë Durrës në bashkëpunim me Seksionin për Hetimin e Narkotikëve, duke u mbështetur në informacionet e siguruara nga inteligjenca policore. Pas arrestimit, Interpol Tirana dhe Interpol Madridi do të merren me procedurat e ekstradimit të Micit në Spanjë.