Policia ka finalizuar me sukses operacionin e koduar “Haze,” duke goditur një aktivitet kriminal në fushën e narkotikëve dhe armëmbajtjes pa leje. Një 35-vjeçar, i identifikuar si B.K., banues në Delvinë, u arrestua në flagrancë teksa transportonte vaj kanabisi me qëllim shitjen e tij në qytetin e Sarandës.

Gjatë operacionit, autoritetet sekuestruan:
•3.5 litra vaj kanabisi;
•një armë zjarri tip kallashnikov;
•një armë të ftohtë (thikë);
•tre krehëra, municion luftarak;
•dhe një sasi kanabis sativa në formë çokollate.

Sipas njoftimit të Policisë së Sarandës, operacioni u bazua në informacione operative mbi aktivitetet e të dyshuarit në aksin rrugor Delvinë-Sarandë. Pas ndalimit dhe kontrollit të tij, si dhe kontrollit në banesë, u konfirmuan të gjitha të dhënat, duke çuar në arrestimin e tij.

Materialet hetimore janë dorëzuar në Prokurorinë pranë Gjykatës së Shkallës së Parë Sarandë për procedurat e mëtejshme ligjore. Ky operacion vjen si pjesë e përpjekjeve të vazhdueshme për të luftuar trafikun e narkotikëve dhe armëmbajtjen pa leje në rajon.