Policia greke ka arrestuar 9 persona në Patra, Greqi, nën akuzën e shpërndarjes së drogës. Grupi kriminal, i drejtuar nga një 49-vjeçar shqiptar, përfshinte një zyrtar të Prefekturës së Greqisë Perëndimore, një shofer ambulance, një punonjës të Universitetit, një zjarrfikës dhe 4 shtetas shqiptarë, si dhe një grek. Ata akuzohen për tregëtinë e kokainës dhe marijuanës.

Gjatë operacionit të zhvilluar nga autoritetet greke, u sekuestruan prova të shumta, përfshirë rreth 74 gram kokainë, 144 gram marijuanë, 23 tableta Xanax, 10 tableta Lexotanil, 9 tableta Stedon, 7425 euro, 3 peshore elektronike, një pistoletë me ajër, 1 grirëse marijuane, 12 celularë, karta SIM, një automjet dhe 3 motorrë.

Policia greke gjithashtu ka identifikuar 30 shtetas të tjerë të përfshirë në grup, përfshirë një polic, një zjarrfikës dhe dy zyrtarë të pushtetit lokal. Sipas hetimeve, grupi kriminal shiste lëndë narkotike në doza të vogla, me klientë që përfshinin edhe zyrtarë publikë. Një pjesë e operacioneve të shitjes së drogës u zhvilluan edhe brenda Universitetit të Patrës, për të shmangur kontrollet policore.