Një tjetër operacion i forcave elitare RENEA ka përfunduar pa sukses në përpjekjet për të arrestuar Eljon Haton, i shpallur në kërkim që prej vitit 2023 në kuadër të dosjes së bujshme “Metamorfoza”. Burime nga Policia bëjnë me dije se kontrollet intensive janë zhvilluar gjatë orëve të mbrëmjes në zonën e Rrethinave, në Shkodër, por Hato nuk është gjetur në asnjë prej vendndodhjeve të kontrolluara.

Sipas informacioneve paraprake, gjatë operacionit janë shoqëruar për t’u marrë në pyetje 5 deri në 6 persona, ndër ta edhe vëllai i Eljon Hatos, me qëllim mbledhjen e informacionit mbi vendndodhjen e të kërkuarit.

Kjo nuk është hera e parë që RENEA zhvillon aksione për kapjen e Hatos. Më parë janë organizuar operacione të ngjashme në Shkodër dhe Tiranë, por asnjëherë me rezultat pozitiv. Deri më tani mbetet e paqartë nëse operacioni i fundit është dekonspiruar, apo nëse Hato thjesht nuk ndodhej në banesë në momentin e kontrolleve.

Eljon Hato është një ndër emrat kyç në hetimin “Metamorfoza”, një dosje që lidhet me rrjete të strukturuara kriminale dhe aktivitet të paligjshëm në disa qytete të vendit. Autoritetet mbeten në ndjekje të tij, ndërsa hetimet për ndihmësit dhe bashkëpunëtorët e mundshëm vijojnë me intensitet.