Policia e Kosovës ka arrestuar katër shtetas serbë që kishin hyrë në territorin e Kosovës pas zgjedhjeve të 9 shkurtit, të cilët po prezantoheshin si “pelegrinë”, por mbi të cilët rëndojnë dyshime serioze për veprimtari të dyfishtë dhe të rrezikshme.
Sipas raportimeve të “Tëvë1” dhe burimeve zyrtare, të arrestuarit janë:
• Branko Rakic, banues në Mitrovicën e Veriut
• Nemanja Vamokiç, toger i policisë serbe, banues në Novi Sad
• Pavle Kragoviç, me banim në Beograd
• Millovan Steviq, kapiten dhe agjent i ushtrisë së Serbisë, banues në Mitrovicë të Veriut
Në momentin e arrestimit, Policia e Kosovës gjeti dhe sekuestruan armë të ftohta, përkatësisht dy thika dhe një sëpatë, si dhe një fotografi të tre terroristëve të vrarë në sulmin e Banjskës, të cilin e udhëhoqi Milan Radoiçiq, person i shpallur ndërkombëtarisht si i kërkuar.
Lidhur me këtë zhvillim, Qeveria në detyrë e Kosovës, pas mbledhjes së Këshillit të Sigurisë, njoftoi se ngjarja e 1 prillit, ku zyra e Postës në Zveçan u sulmua me dy granata dore, së bashku me arrestimet e fundit, ngre alarmin për rritjen e vigjilencës institucionale dhe të sigurisë.
Në njoftimin zyrtar thuhet:
“Kur kësaj i shtojmë edhe arrestimin e mbrëmshëm të katër ‘pelegrinëve’ serbë në Gjakovë – nga të cilët njëri ishte toger i policisë së Serbisë e tjetri kapiten i ushtrisë së Serbisë, dhe krejt çfarë u është konfiskuar atyre – kërkohet që të gjitha institucionet dhe mekanizmat e shtetit ta mbajnë lart vëmendjen dhe gatishmërinë.”
Me urdhër të prokurorit, të katër shtetasit janë dërguar në mbajtje, ndërsa hetimet për përcaktimin e rolit të tyre të mundshëm në akte destabilizuese në veri të vendit pritet të vijojnë.
Ky është një zhvillim i rëndësishëm në kuadër të sigurisë kombëtare të Kosovës, veçanërisht pas sulmit të Banjskës dhe tensioneve të vazhdueshme në veri, ku strukturat ilegale serbe vazhdojnë të paraqesin rrezik për stabilitetin dhe integritetin territorial të vendit.
