Policia e Lezhës ka finalizuar me sukses operacionin antidrogë të koduar “Kamuflimi”, duke çuar në arrestimin e tre shtetasve dhe shpalljen në kërkim të një të katërti, të gjithë të përfshirë në shitjen e lëndëve narkotike në zonat turistike të Shëngjinit.

Të arrestuarit janë:
• A. G., 21 vjeç, nga Kosova
• E. T., 28 vjeç, nga Kosova
• S. B., 43 vjeç, shtetas francez

Në kërkim është shpallur shtetasi A. G., 30 vjeç, po nga Kosova.

Gjatë kontrolleve fizike, u sekuestruan doza kokaine, kanabisi (edhe në formë çokollate), MDMA, ekstazi dhe kërpudha haluçinogjene, si dhe 1 automjet dhe 3 celularë që dyshohet se përdoreshin për veprimtarinë kriminale.

Sipas hetimeve, këta persona bashkëpunonin për shpërndarjen e dozave të drogës në ambientet e frekuentuara nga pushuesit. Në celularët e sekuestruar janë gjetur komunikime që dokumentojnë organizimin e trafikut.

Policia vijon punën për kapjen e personit në kërkim dhe për identifikimin e bashkëpunëtorëve të tjerë të përfshirë në këtë rrjet.

Materialet procedurale janë referuar në Prokurorinë e Lezhës për veprime të mëtejshme, nën akuzën “Prodhimi dhe shitja e narkotikëve”.