Dy persona janë arrestuar në Durrës pasi u kapën me lëndë narkotike kokainë të ndarë në doza, gati për shitje. Operacioni i koduar “Last Dinner” është finalizuar nga Seksioni për Hetimin e Narkotikëve i DVP Durrës në bashkëpunim me Forcën e Posaçme “Shqiponja”.

Në kuadër të megaoperacionit “Tempulli”, ku u administruan informacione të siguruara nga inteligjenca policore, u identifikua se dy shtetas po shisnin kokainë në lokalet e natës në Durrës. Gjatë operacionit, në afërsi të Stacionit të Trenit, u arrestuan në flagrancë shtetasit G. D., 19 vjeç dhe A. L., 19 vjeç, të dy banues në Shënavlash, Durrës. Ata u kapën për veprën penale “Prodhimi dhe shitja e narkotikëve” kryer në bashkëpunim.

Nga kontrolli i automjetit me të cilin lëviznin, policia gjeti dhe sekuestruan një sasi lënde narkotike kokainë të ndarë në doza, gati për shitje. Ky operacion i suksesshëm është një hap i rëndësishëm në luftën kundër tregtisë së paligjshme të narkotikëve në rajon.