Strukturat e DVP Shkodër kanë finalizuar fazën e katërt të operacionit policor të koduar “Neonët 4”, në kuadër të goditjes së kultivimit të bimëve narkotike në ambiente të mbyllura me anë të llambave. Me këtë fazë, shkon në shtatë numri i ambienteve të zbuluara dhe të goditura gjatë operacionit.

Gjatë aksionit, Policia arrestoi në flagrancë shtetasin Gj. B., 22 vjeç, banues në Laç, Vau i Dejës, i cili kishte marrë me qira një banesë në Velipojë dhe e kishte përshtatur për kultivimin dhe tharjen e kanabisit. Po ashtu, u ndalua shtetasi R. V., 25 vjeç, banues në Shkodër.

Në vijim, nisi procedimi penal për dy punonjës të OSHEE-së, shtetasit A. U., 50 vjeç, dhe Gj. T., 59 vjeç, të dy banues në Velipojë, për veprën penale “Shpërdorimi i detyrës”, kryer në bashkëpunim. Një punonjës tjetër i OSHEE-së u arrestua.

Nga kontrollet në banesën e përshtatur për veprimtari kriminale u sekuestruan 308 bimë të dyshuara narkotike kanabis, 85 gramë kanabis i tharë, 122 pajisje elektrike për kultivim, 4 telefona celularë. Ndërsa në banesën e R. V. u gjetën dhe sekuestruan 3 llamba dhe një përforcues grushti.

Operacioni u zhvillua nga Komisariati i Policisë Shkodër në bashkëpunim me Seksionin për Hetimin e Narkotikëve, të mbështetur nga Forca Operacionale dhe “Shqiponjat”. Hetimet vijojnë për dokumentimin e plotë të kësaj veprimtarie kriminale, ndërsa materialet procedurale i janë referuar Prokurorisë së Shkodrës për veprime të mëtejshme.