Policia e Tiranës ka finalizuar me sukses operacionin e koduar “Pasagjeri”, duke vënë në pranga një 32-vjeçar të armatosur, i cili lëvizte me taksi për të shmangur kontrollet policore.

Shtetasi i arrestuar, A. Ç., rezulton me precedent të mëparshëm penal për krime kundër jetës. Ai u ndalua në rrugën “Myslym Keta” nga Forcat e Posaçme “Shqiponja”, të cilat kishin siguruar informacion se ai lëvizte i armatosur.

Gjatë kontrollit, në çantën e tij u gjetën:

• Një armë zjarri pistoletë me municion luftarak

• Një thikë

• 9900 euro dhe 250 000 lekë

Në përfundim të veprimeve procedurale, 32-vjeçari u arrestua në flagrancë për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”.

Materialet procedurale i kaluan Prokurorisë së Tiranës për veprime të mëtejshme.