Sot, më 14 Nëntor, Policia e Shtetit njoftoi finalizimin e operacionit policor të koduar “Crossborder line”, rezultat i një hetimi të zgjeruar që ka zgjatur më shumë se një vit dhe është zhvilluar në drejtimin e Prokurorisë së Gjirokastrës. Ky hetim, i kryer me metoda proaktive, çoi në arrestimin e 4 personave, dy prej të cilëve akuzohen si organizatorë të trafikut të drogës dhe të klandestinëve drejt Greqisë. Pesë persona të tjerë u shpallën në kërkim, ndërsa dy të tjerë po hetohen në gjendje të lirë.
Sipas njoftimit zyrtar të Policisë së Shtetit, hetimi është zhvilluar nga Seksioni për Hetimin e Trafiqeve dhe Narkotikëve, në bashkëpunim me Seksionin Operacional të DVP Gjirokastër dhe Komisariatin e Policisë Tepelenë. Operacioni ka çuar në ekzekutimin e masave të sigurisë për 6 të dyshuar, nga të cilët 4 prej tyre me masën “arrest në burg”, pasi akuzohen si pjesëtarë të një grupi kriminal që trafikonte lëndë narkotike cannabis sativa drejt Greqisë dhe ndihmonte emigrantë të kalonin kufirin ilegalisht, kundrejt pagesës.
Personat e arrestuar janë:
P. L., 49 vjeç, banues në Tepelenë, i dyshuar si organizator i veprimtarisë kriminale të trafikimit të lëndëve narkotike.
Y. Ç., 55 vjeç, banues në Tepelenë, i dyshuar për ndihmë në kalim të paligjshëm të kufijve, kryer në bashkëpunim.
V. Z., 52 vjeç, banues në Libohovë, i dyshuar për trafikim të narkotikëve dhe ndihmë për kalim të paligjshëm të kufijve, kryer në bashkëpunim.
A. S., 54 vjeç, banues në Gjirokastër, i dyshuar për ndihmë në kalim të paligjshëm të kufijve, kryer në bashkëpunim. Ky shtetas ndodhet aktualisht në paraburgim për të njëjtën vepër penale të kryer më parë.
Gjithashtu, masat e sigurisë “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit” u ekzekutuan ndaj dy shtetasve:
V. Ç., 58 vjeç dhe S. Ç., 51 vjeç, vëllezër, banues në Libohovë, të dyshuar për trafikim të narkotikëve, kryer në bashkëpunim.
Ndërkaq, policia shpalli në kërkim 5 persona të tjerë:
E. N., 40 vjeç, banues në Gjirokastër, ndaj të cilit është caktuar masa e sigurisë “arrest në burg” për veprat penale të trafikimit të narkotikëve dhe ndihmës për kalim të paligjshëm të kufijve (aktualisht i arrestuar në Greqi).
A. N., 54 vjeç, banues në Gjirokastër.
K. M., 32 vjeç, banues në Belsh, Elbasan.
A. Sh., 23 vjeç, banues në Kukës.
L. H., 32 vjeç, banues në Belsh, Elbasan.
Këtyre të fundit Gjykata u ka caktuar masën e sigurisë “arrest në shtëpi” për trafikim të narkotikëve, kryer në bashkëpunim.
Hetimet dokumentuan se ky grup kriminal ishte organizuar për trafikimin e lëndës narkotike cannabis sativa drejt Greqisë dhe për ndihmën ndaj grupeve të emigrantëve që kalonin kufirin Greqi-Shqipëri ilegalisht, kundrejt pagesës.
Gjatë hetimeve, policia sekuestroi shuma të konsiderueshme parash, municione luftarake, celularë, automjete dhe dokumente të falsifikuara. Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.
