Në kuadër të operacionit policor të koduar ‘Real Estate’ dhe në zbatim të masave të përcaktuara në planin operacional kombëtar ‘Sundimi i ligjit’ në Elbasan, janë sekestruar pasuri me vlerë rreth 550 mijë euro.

Dyshohet se këto e kanë burimin nga veprimtaritë kriminale të dy shtetasve, të cilët janë dënuar njëri në Itali, tjetri në Belgjikë, për veprën penale “Trafikimi dhe shfrytëzimi për prostitucion”.

Në veçanti, është sekuestruar një objekt 3-katësh në Cërrik dhe një automjet “Lamborghini”.

Nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga Arjan Kamami, i cili është i dënuar në Belgjikë për veprën penale “Trafikimi dhe shfrytëzimi për prostitucion”.

Gjithashtu, është sekuestruar një objekt banimi me sipërfaqe 105 m2 në Elbasan.

Dyshohet se kjo pasuri e sekuestruar ka burimin nga veprimtaritë kriminale të kryera nga 34-vjeçari Uard Kaloti, i cili ka qenë i dënuar më parë në Itali për veprën penale “Trafikimi dhe shfrytëzimi për prostitucion”.