Policia e Kosovës ka arrestuar katër persona në Prishtinë si pjesë e operacionit policor të koduar “Starti”, i cili çoi në sekuestrimin e 25 kg marihuanë, armëve dhe mjeteve të tjera të paligjshme.

Operacioni u zhvillua në koordinim me Prokurorinë e Krimeve të Rënda, duke përfshirë katër kontrolle në lokacione të ndryshme të kryeqytetit.

Gjetjet e operacionit:

27 paketime me lëndë narkotike të dyshuar si marihuanë, me peshë totale prej 25 kg e 200 gr
Një automjet
Dy pushkë dhe dy revole
Shtatë fishekë të kalibrave të ndryshëm
Gjashtë telefona celularë
350 euro para të gatshme

Të arrestuarit janë identifikuar si:

B.M. (1981, mashkull kosovar)
L.K. (1979, mashkull kosovar)
M.K. (1979, mashkull kosovar)
F.H. (1991, mashkull kosovar)

Policia dyshon se lënda narkotike ishte e destinuar për tregun vendor. Të arrestuarit janë intervistuar në prani të avokatëve mbrojtës dhe ndaj tyre janë ngritur akuza për “blerje, posedim, shpërndarje dhe shitje të paautorizuar të narkotikëve” si dhe “mbajtje të paautorizuar të armëve”.

Me vendim të prokurorit, ata janë dërguar në mbajtje për 48 orë, ndërsa hetimet për rastin po vijojnë.