Vijon operacioni i koduar “Storm 9”, i zhvilluar katër ditë më parë nga Policia e Durrësit për goditjen e një rrjeti ndërkombëtar të trafikimit të femrave me qëllim shfrytëzimin për prostitucion.

Në kuadër të hetimeve, është arrestuar në pikën kufitare të Muriqanit shtetasi kolumbian Duvan Gomez, 28 vjeç, i shpallur më herët në kërkim. Sipas policisë, Gomez dyshohet se rekrutonte gra kolumbiane duke u premtuar punësim në Shqipëri kundrejt një pagese prej 3000 eurosh, por më pas i detyronte të ushtronin prostitucion.

Gjatë operacionit u sekuestruan tre telefona celularë që ai dyshohet se i përdorte për komunikim me rrjetin e bashkëpunëtorëve dhe klientët.

Sipas hetimeve, dy shtetase kolumbiane u gjetën më herët gjatë kontrollit të policisë në një apartament në lagjen nr. 18 në Durrës, ku ushtronin prostitucion dhe shisnin lëndë narkotike.

Operacioni “Storm 9” është rezultat i tre javësh hetime intensive me metoda proaktive dhe bashkëpunim mes strukturave të DVP Durrës dhe Policisë Kufitare Muriqan.

Materialet i janë referuar Prokurorisë së Durrësit për veprime të mëtejshme, ndërsa hetimet vijojnë për identifikimin e personave të tjerë të përfshirë në këtë rrjet trafikimi.